曼聯奧脫褔開P 玩殘Hea踢史雲斯

猪拉多纳

夢劇場最後公演！曼聯今晚喺英超主場對史雲斯，係領隊費格遜榮休前最後一次喺奧脫福領軍，兼且賽後仲有頒獎捧盃大派對，以後紅魔主場係咪可以延續夢劇場光榮傳統，冇人知！為咗做好呢場騷，有消息話費爵爺或會將朗尼解禁畀佢打正選，唔玩1.67倍「讓球主勝」點得？

（有線200及300、廣東體育周日晚11:00直播）

雖然曼聯喺聯賽提早封王，史雲斯又唔憂降班，但話晒都係今季英超冠軍對英聯盃盟主，應該唔會踢悶波趕客啩？事實上，消息話費爵爺怕告別奧脫福失威，可能用番扭計離隊嘅朗尼打正選，拍住好大機會成為今季英超神射手嘅尹佩斯孭飛。報道仲話，朗尼喺費爵爺游說下，考慮拋開同新領隊莫耶斯嘅恩怨，放棄離隊添喎！
紅魔3老齊上陣道別

假如朗尼真係選擇留隊，今場當然要入波氹番紅魔粉絲啦！仲有呀，報道話費爵爺會安排史高斯、傑斯同里奧費迪南同場正選上陣，佢哋跟咗費爵爺咁多年，又點捨得要老人家嘅奧脫福告別戰失威。至於正選位置唔穩陣嘅香川真司、路爾斯華倫西亞同湯卡華利，就更加要為下季前途搏命，鬥心唔需要懷疑。
史雲斯贏完聯賽盃謝晒

另一方面，史雲斯唔需要擔心降班，贏咗聯賽盃冠軍後，近9場聯賽得2勝3和4負，擺明開始Hea踢。加上今季大爆發嘅王牌米捷未好番，就算曼聯有右閘拉菲爾達施華停賽，佢哋都唔似有本事破壞費爵爺嘅歡送派對。今場波有今生冇來世，無論你係咪紅魔粉絲，都一定要坐喺梳化等開場睇直播啦！
費Sir主場領軍75%獲勝

曼聯係費格遜領軍下，歷來404場英超主場有304場贏波，得勝率75%。

紅魔近3次對史雲斯，4個士哥全部上半場攻入。

尹佩斯近5次為曼聯上陣攻入6球。

史雲斯近9場未試過半場領先，6次打和、3次落後。
史雲斯半場曳熱捧主主

如果怕曼聯提早封王心散，未必炒得起史雲斯，咁改玩1.7倍「主主」都係唔錯選擇。畢竟費爵爺嘅奧脫福告別戰，點睇都唔似W唔出，撞啱史雲斯半場戰績曳到爆，對上9場有7次上半場冇波入，去到奧脫福似乎好難頂得住半場唔輸，只要曼聯上半場有波入，「主主」應該好難走得甩！