貝湯美獲大摩力撐

猪拉多纳

　　正所謂「關公都有對頭人，曹操都有知心友」，人夾人，有時真係講個緣字。以馬圈為例，其實好多時都有騎師來港客串，甚至落地生根，有運的，首日上場隨時已獲得大馬房垂青，騎一手好馬贏到開巷，第二朝份份馬經頭版都是自己個贏馬樣；冇運的，唯有騎幾匹低班庸手，應了那句馬經術語「混入馬林中」。

　　還記得現時已與馬會解約的郭立基，上季首度在港上陣之日，八匹坐騎都係下風馬，入唔到三甲何奇之有？而今季來港搵食的霍勵賢，表現則稍好，首日即以「路路好」打開勝門。反觀四月尾才來港客串的貝湯美，明顯比兩人有運，4月28日首度落場，大摩已經畀馬佢騎，其中一匹更是出爭女皇盃的「軍事出擊」。難得大摩垂青，貝湯美亦不負所托，替「軍事出擊」贏出國際一級賽。

　　近期貝湯美與大摩合作成績亦唔錯，剛戰又憑「贏得」攜手奪施偉賢盃，看來日後大摩仍會力撐騎者。賭錢有時要跟紅頂白，記得吼實此對組合。洋超