白禮頓主場左右開宮 W得！

猪拉多纳

連「英冠神射手」格連梅利都傷埋，水晶宮仲憑乜晉級打決賽？英冠升班附加賽四強次回合，白禮頓回師主場鬥水晶宮，首回合「海鷗」作客形勢都佔優，最後互交白卷，難怪領隊普耶囂爆咁話今場係「XX波」。水晶宮季尾曳，仲連神射手都傷埋，梗係捧主W！

（周二凌晨2時45分開賽）

前車路士烏拉圭中場普耶，09年成為白禮頓領隊，翌季就帶領球隊稱霸英甲。上季於英冠企穩陣腳後，本季「海鷗」終於起飛，成功殺入前六打升班附加賽。普耶極度注重紀律，將白禮頓訓練到組織力、機動性並重，後防更非常穩固，今季聯賽場均只失0.93球，成為「英冠防守王」。

白禮頓主場威力勁，近兩季於盃賽兩勝英超大軍紐卡素，今年年初於足總盃亦逼到英超前列球隊阿仙奴有氣冇碇抖，完場前失波僅僅落敗。若論組織性及控制節奏能力，白禮頓絕對具備英超中游嘅級數，故首回合去到水晶宮地頭，上半場控制戰局，幾下到肉攻勢幾乎贏埋，下半場轉攻為守，最終作客賽和0比0。賽後普耶一改低調作風，話次回合贏波機高，佢講係「XX波」似乎已經好保守。可以估計白禮頓今仗會喺主場搶攻，力求盡快解決對手。
水晶宮傷埋神射手

水晶宮阿頭荷路維只係一介莽夫。水晶宮去到季尾全面跌Watt，首回合傷埋聯賽神射手、本季攻入30球嘅格連梅利。另一攻擊手韋費特沙夏個心一早已飛到新東家曼聯嗰度，近11場都冇入過波。往績方面，聯賽水晶宮作客白禮頓淨吞3蛋，今場又點可以唔捧白禮頓場？