曼城未回魂等畀雷劈

猪拉多纳

文仙尼瀕臨被炒，球員輸畀韋根仲未回魂，聯賽亞軍又坐定粒六，曼城仲憑乜去讓波？英超曼城作客雷丁，客軍剛於足總盃決賽爆大冷輸波，陣營愁雲慘霧，作客讓波擇使。雷丁降班前最後一場主場聯賽，必想好好睇睇，捧「讓球主勝」同細盤。

（有線301及201台周三凌晨3時直播）

曼城足總盃決賽遇着韋根，贏波賠率得1.24倍，係人都以為曼城贏硬，但最後打少一個，仲喺補時階段被射破大門，呢次輸波可以話奇恥大辱。今季曼城衞冕英超失敗，歐聯分組賽出局，最後連足總盃都冇埋，四大皆空得非常肉酸。據英媒報道，文仙尼將於本周內被炒，如果你係佢，仲有冇心情備戰今仗？曼城仲有兩場聯賽喺手，今仗就算輸波，下場主場對諾域治攞一分都奪亞軍，呢場大條道理去hea。預料文帥會收起阿古路等主力，用迪斯高、魯迪維爾、查維加西亞、尼史葛等打正選，作客讓波？傻o架咩。
雷丁降班要冧番主場fans

雷丁篤定降班後，上仗作客富咸贏四比二，領隊艾堅斯仍希望球隊打出強勢。雷丁打出大半季衰波，於本季最後一場主場聯賽，都想食番鋪尾胡，遇着力疲心傷嘅冇牙老虎，雷丁受讓好路。曼城冇神冇氣，雷丁攻力麻麻，捧埋細盤啦！