武里南聯賓約哥「半場和」好路

猪拉多纳

同日另一場亞冠盃16強首回合，泰國球隊武里南聯主場對烏茲別克球隊賓約哥，兩軍好似孿生兄弟，大踢穩陣波。武里南聯喺兩位主將甘美奧干沙利斯同隊長蘇查奧停賽之下更加唔敢亂來。料首回合交鋒雙方會先以互相試探為主，開細盤機會高，但賠率唔吸引，建議要1.95倍「半場和」。

（now671周二晚7時直播）

武里南聯被睇低一線下打入16強，皆因有自知之明以穩守行先，尤其係上半場不求有功但求無過，等企穩陣腳再謀突擊，六場分組賽有四次上半場互交白卷。既然呢套戰術奏效，當然會續用。

賓約哥都係靠防守打天下，六場分組賽僅失三球。但泰國天氣炎熱，佢哋會避免上半場體力消耗過大，留待下半場搏拳，半場和味濃。