文仙尼等炒曼城散晒搞唔掂雷丁

猪拉多纳

曼城教頭文仙尼喺足總盃決賽倒灶不敵韋根，失落今季唯一獎盃希望之後，英國傳媒隨即爆出馬拉加主帥比歷連尼快將落實接任，今晚「藍月亮」喺英超作客雷丁甚至隨時冇文仙尼份咁話，無論消息孰真孰假，班波唔爭氣係鐵一般嘅事實，卡爾萬今晚力挺升咗溫嘅雷丁2.55倍「讓主」。

（有線201、301周三凌晨3:00直播）
雷丁「零壓力」踢好波

曼城主場戰績標青，不過聯賽作客就得人驚，近期除咗1球小勝同市宿敵曼聯同阿士東維拉，面對熱刺、愛華頓同修咸頓都以2球差距落敗，就連昆士柏流浪都能夠以0:0死守到尾，可見「藍月亮」作客腳仔軟情況嚴重，加上文仙尼嘅炒魷傳聞同足總盃奪冠希望幻滅重挫士氣，球員好難喺咁短時間內回氣調整。

主隊雷丁雖然篤定降班，但反而令佢哋放開懷抱踢好波，上輪作客4:2大勝富咸就係好例子，終止近10場2和8負不勝劣勢之餘，中場笠臣簡奴梅開二度、首席射手方祖後備入替打破11場聯賽入球荒，全部都係「零壓力」之下嘅巔峰演出，今晚喺主場收爐戰唔難做多齣好戲，答謝球迷。