賓菲加車仔細難擋

猪拉多纳

今日呢篇稿極可能係今季最後一次，真係有啲唔捨得，不過開心嘅時間總係過得特別快。

歐聯決賽要等到5‧25深夜先有得睇，今晚就先睇場歐霸盃決賽賓菲加對車路士熱吓身先。睇吓「葡超」定「英超」球隊勁啲，可以喺荷蘭阿積士嘅阿姆斯特丹球場捧走歐霸盃返國啦！
車路士要捧盃交代

先講賓菲加，今季唔失禮，喺聯賽同宿敵波圖爭到你死我活，不過上場大家一碰，賓菲加最終唔夠波圖砌，仲斷埋今季聯賽不敗紀錄，最氣頂就係失晒呢三分畀波圖爬埋頭，個聯賽「一哥」位要同對方對調。

至於車路士，依家喺英超第三位應該都穩穩陣陣，下場主場對愛華頓全無壓力。（順道賣吓廣告，車路士對愛華頓呢場球彩台有直播睇）。近況方面，上場藍軍對阿士東維拉贏得驚險，靠林柏特發揮神勇本色連入兩球，成為贏波功臣，仲以203個喺車仔嘅入球，破埋前輩譚比寧所保持嘅紀錄添。

形勢上，由於呢個禮拜賓菲加仲要同波圖爭葡超冠軍，有後顧之憂。相反，車路士已穩獲下屆歐聯資格，現時唯一目標就係呢隻歐霸盃，若然今晚捧盃，今季起碼有個錦標喺手，叫做對班擁躉有番啲交代啦！

車路士同賓菲加過往對賽過三次，「車仔」都贏晒，有往績支持，今場我揀車路士捧盃。但始終賓菲加有番咁上下實力，大家都小心翼翼之下，我相信比數又唔會好誇張，可以試買入球細啦！

車車推介：賓菲加　對　車路士

主客和：車路士勝、入球細