甘美奧養精蓄銳唔怕聖達菲

猪拉多纳

南美自由盃聽朝有兩場16強次回合賽事，其中巴甲勁旅甘美奧挾住首回合領先2:1優勢，今鋪作客哥倫比亞嘅聖達菲，形勢有利大可專心穩守突擊求勝。最緊要係，甘美奧主帥盧森保高仲特意拉隊提早一星期抵達波哥大，適應當地高原戰場，養精蓄銳下，今仗受讓要保住唔輸晉級絕對唔難，力奇捧1.8倍「讓客」！

（開賽時間：周五早上9:30）
提早到埗適應高原氣候

作客位處海拔2,600米嘅波哥大從來都唔會易踢，舊年甘美奧就試過出訪另一支哥超球隊米倫拿列奧輸咗1:3。主帥盧森保高經驗豐富唔敢大意，趁住班波自從月初踢完首回合後一直冇比賽，上周三提早拉隊去到波哥大，等班球員可以適應高原氣候。球隊做足準備工夫，陣內又只得中堅克里斯停賽，仲有中場名將艾蘭奴同薛羅拔圖孭飛，今鋪只求和波出線，應該唔難完成任務。

聖達菲方面，近一個月幾乎都係一周雙賽，球員話唔攰就呃你嘅，事實上班波近況麻麻，近5戰只得1勝，今晚焗住攻後防難免空虛，加埋防線主力丹尼爾羅亞因傷缺陣，隨時輸埋都唔出奇。
南美自由盃賽制

採主客兩回合制，今輪為16強次回合。兩回合計打和，將計算作客入球優惠，未分勝負將於次回合法定時間後，以互射12碼決勝。
首回合：聖客負1:2