皇馬再嗒馬體會

猪拉多纳

近10對戰全勝 私家「床單」正好眠

「床單兵團」難破宿命！今晚西班牙盃決賽爆發首都打吡大戰，由皇家馬德里火併馬德里體育會，眾所周知皇馬一直騎住「床單兵團」馬體會穩坐同市一哥位，淨計「寸王」莫連奴掌舵後，八戰「床單兵團」贏晒就知有幾格食格喇，射手Ｃ朗腳風又順，今仗仲要喺皇馬嘅巴拿貝主場舉行，集天時地利人和於一身，天命不可違，「銀河艦隊」勢必贏波封王，斯維強捧主勝。

有啲球隊生成二奶命，好似馬體會長期畀皇馬騎住，難得今季皇馬出閘脫腳，「床單兵團」季初挾主場全勝、力逼巴塞之勢位列次席，滿以為今季可以騎住同市宿敵，點知去到季中頻頻失分，最慘係對親強隊都欠缺信心，近兩次硬撼皇馬同巴塞表現唔曳兼先開紀錄，最終卻反勝為敗，尤其上月尾主場對皇馬，後者心繫歐聯而起用卡維奴、艾比奧爾、艾辛、卡卡、艾華路莫拉達等副選，讓晒車馬炮，結果馬體會喺領先下唔識點踢，又「擺烏龍」葬送好局，呢種心理問題，絕非一朝一夕能夠解決。
葡國雙煞專「摺」床單

相反，皇馬面對同市宿敵時嘅贏家氣質就爆晒燈，唔單止近十四年來共廿五次碰頭未嘗一敗，仲贏咗十九次，包括近十戰全勝，單計莫連奴自2010年入主之後，八戰馬體會全勝而回，堪稱打吡之王，況且佢離隊在即，都想捧番隻盃好頭好尾。雖然莫帥繼續封殺卡斯拿斯同比比，年輕中堅華拉尼因傷收咧，但奧斯爾、希古恩、沙治奧拉莫斯及時傷愈，王牌球星C朗對親馬體會特別醒神，之前六次有份披甲轟七粒，「床單兵團」見到「莫、朗」呢對葡國雙煞，真係未踢已經腳軟。加上今仗安排喺皇馬主場巴拿貝球場上演，有埋地利冇甩拖喇，一於捧主勝。
有績可尋

在對上10屆西班牙盃決賽，馬德里體育會只有一次打入決賽，結果淨吞兩蛋失掉錦標。皇家馬德里則兩次打入決賽，結果有一次奪標，但可留意兩仗同樣在法定時間內打和，要戰至加時至分出勝負。

近10屆決賽較旺開大，以中位數「2.5球」計，曾開出6大4細。半場大細方面，以中位數「1.5球」計，大、細各佔5次。
西班牙盃決賽

皇家馬德里 VS 馬德里體育會

周六凌晨3時30分 now 632直播