感恩現真面目

猪拉多纳

　　今日田草C欄賽事，局勢比較混亂，大家都知道，周末跑馬有時窄窄哋，失驚無神走啲大冷門入嚟，好似上周末，幾十倍W都爆兩匹，冷至99倍一樣可以入Q，真係可怕！所以，呢類場合往往不宜大注出擊，輕手玩吓無妨，費事明知故犯。

　　第六場四班1400米。「感恩」之前贏過「隨心隨意」，也曾經與「品學兼優」串Q，四班身份尊貴。今次遇着一批似強非強對手，沉底鱷隨時又會除下面具。何況，今次C欄1檔估計賺到內欄之利，如果場地偏慢仲好跑，獨贏十倍八倍值博。

　　第九場三班1400米。「白鷺高飛」四班跑3場取得1冠1亞1殿，能夠贏到「寶寶飛龍」，實力一定有番咁上下。啱啱嗰場升上三班上陣，後上跑第四，末段衝勢唔錯，而能夠輸唔遠畀季軍「威武福星」，顯示到自己在三班唔會冇得贏。假如有了1場經驗令到自己增值，有權爆半冷。

　　第十場三班1400米。「旗幟鮮明」熱門地位走唔甩，獨贏好難會有3倍或以上，新升班又如何，一樣熱到辣手，喜唔喜歡，因人而異，但呢匹馬真係有好大進步，上場可以贏到「驚雷」冇得跑，重返1400米表現出嘅威力，比起前仗1200米勁得多。既然進步中，上到二班仍然夠惡，尾場揀膽，梗係佢最穩健。

　　點买法

　　「感恩」及「旗幟鮮明」，一冷一熱兩匹大摩馬匹，一於買條獨贏過關2x3。而QT場次揀第六場，揸匹冷膽，拖腳要番幾匹熱門如「勁贏晒」、「慣勝福星」、「乘奔御風」及「樂馳」。