里爾踩大油門衝三甲

猪拉多纳

法甲已經去到直路衝刺，焦點集中在爭前三嘅歐聯參賽資格身上，「四哥」里爾今輪作客蒙彼利埃，在腳風超順嘅星級前鋒沙洛文卡勞帶領下，依家里爾只係差第三嘅里昂三分，為「錢」途一定搏甩髀，不過蒙彼利埃喺冇乜心理包袱下，近期有前冇後大踢性感足球，雙方勢必大駁火，1.75倍嘅大盤有買趁早。

（周日凌晨3時開賽）
蒙彼利埃主場謝幕鬥攻

每支球隊都有靈魂人物，美斯對巴塞有幾重要唔使多講，唔好睇科特迪瓦嘅沙洛文卡勞以前喺車路士只係「二打六」，今季過檔里爾後即刻變身星級前鋒，唔單止轟入十三粒成首席射手，其出色嘅策應能力，亦大大激活球隊嘅進攻組織，身旁嘅皮耶、巴沙及路蘭洛斯受益不淺。

聯賽剩番兩輪，依家里爾只係落後第三位里昂三分，唔係冇得追，以佢哋近十仗有九場開大嘅強橫攻力，為咗呢張歐聯入場券，一定火力全開炮轟對手爭勝。

雖然蒙彼利埃已經無欲無求，但球員反而喺冇乜壓力下更加踢得放，前線蘇利文尼卡馬拉同貝漢達頻有士哥，但防線甩漏多，變得入得又失得，已經連續六場開大，今仗又係主場謝幕戰，點都唔想喺粉絲面前輸波咁肉酸，一於照攻唔赦你，客勝唔算太穩陣，既然呢場係鬥攻格局，捧入球大更加划算。

至於護級方面，排第十五嘅阿些斯奧仍未上岸，鬥心毋庸置疑，好彩今輪作客遇到近九仗輸八場、全隊無心戀戰等收咧嘅雷恩，係坐和望贏格，「讓球客勝」好路。