莊家擺明睇淡弗賴堡

猪拉多纳

費sir、史高斯、碧咸都會喺季尾光榮引退，而德甲方面，史浩克32歲嘅後衞梅斯達都話今場煞科戰後會掛靴，可能好多德國隊粉絲都會唔捨得佢，佢一路受傷患困擾，今晚雖然無機會落場，但都有可能會有歡送儀式。

我對梅斯達就無咩感情可言，但就唔多鍾意史浩克呢班波，諗住佢哋有心爭歐聯資格，上周主場會贏已經風流波嘅史特加，點知累我輸錢。依家排第四嘅史浩克僅領先今場對手弗賴堡一分，今場贏波就可以保住歐聯外圍賽資格，莊家開出史浩克作客讓平半，對佢哋贏波都幾有信心。史浩克除咗幾個長期傷兵外都算人齊，亨特拉爾、剛續約嘅達斯拿、法芬等等都可以上陣，我今晚就信多史浩克一次。

信客隊其中一個原因，係唔相信弗賴堡有心爭歐聯，以其質素踢歐聯外圍真應該好早出局，而佢哋歐霸嘅資格就非常穩陣，今場真係唔需要搏。弗賴堡今季主場有8勝4和4負，喺呢個場威力唔錯，排名同對手差一位都有得受讓，就知莊家幾咁睇淡佢哋，加上主力中場卡利古尼亦要停賽，影響整隊發揮，買對家啱晒。