往績食住聖伊天 馬賽受讓咪走寶

猪拉多纳

或者大家認為已經攞咗來屆歐聯席位嘅馬賽，今晚作客聖伊天或者會Hea踢了事，不過雷法爾唔係咁睇，事關馬賽後防大將尼高拉斯尼古路同佢班手足話明要「騷哥利」，加上隊波一向食住聖伊天，根本勒都勒唔住，難得馬賽受讓，2.05倍「讓球客勝」咪走寶！

（now714台周日凌晨3:00直播）
聖伊天歐聯資格名存實亡

馬賽雖然攞咗下屆歐聯入場券，之但係呢班波弗到漏油，已經連續10場不敗，個勢咁好，你話停就停咩？前鋒阿休同基格納輪住發威，中場華布拿又幫手穿針引線，根本唔驚馬賽冇波入。最重要係佢哋近9戰只係失咗2球，足見以尼高拉斯尼古路為首嘅防線夠晒穩陣，呢位喀麥隆中堅啱啱喺周二嘅法甲最佳非洲外援球員選舉入面，竟然倒灶輸畀聖伊天射手奧巴美揚，谷到成肚氣，今場肯定有仇報仇，零封對手！

聖伊天係就係攞咗法國聯賽盃冠軍，不過佢哋上仗輸咗畀羅連安特，聯賽得番2場，里昂又咧住4分，聖伊天來屆歐聯夢接近幻滅，班球員會唔會洩氣，真係好難講。好，就當佢哋搏盡，但呢班波近9次對馬賽只得4和5負，點信得過呀？