車仔心散難食拖肥

猪拉多纳

車路士主場鬥愛華頓，車仔今仗要贏波先可確保取得季軍直入下屆歐聯分組賽，不過球員上周搏完歐霸盃決賽，體力上肯定比對手輸蝕。「拖肥糖」表現向來夠硬淨，而且球隊上下都希望以勝利歡送莫耶斯，車路士讓半一略嫌太多，波童捧下盤。

根據英國傳媒報道，如果車仔最終能以第三名過終點，賓尼迪斯將可額外獲得25萬鎊獎金，不過一班正選球員上周喺歐霸盃決賽搏得好盡，就算賓帥今場用番丹巴巴亞踢正選，但陣中傷停多，拉美利斯坐波監，夏薩特、泰利又有傷，想輪換都冇乜太多選擇，鬥體力好蝕底。
愛華頓望贏歡送莫耶斯

愛華頓無論贏輸都肯定以第六名過終點，不過呢班波向來有鬥心，過去六季聯賽煞科戰都未輸過，當中06/07及10/11兩鬥車仔取得一勝一和。今場係領隊莫耶斯告別之戰，相信球隊上下都想令佢留下美好回憶，戰意一定有。

愛華頓近十場聯賽僅一負，作客鬥另外兩支角逐歐聯入場券嘅球隊阿仙奴及熱刺都唔使輸，受讓半一值得捧場。
車仔淡定熱刺閉翳

車路士以三分領先熱刺，由於得失球差領先十六球，除非車路士主場對愛華頓以大比數落敗，同時間阿仙奴贏紐卡素兼熱刺對新特蘭以大比數勝出，否則車路士肯定可以前四過終點；阿仙奴只要擊敗紐卡素便穩入前四，熱刺形勢最被動，除咗要自己贏波，仲要望阿仙奴失分，才可取得歐聯參賽資格。

一旦出現車路士、阿仙奴同分、同得失球差及同得球情況，賽會宣布會在五月廿六日在中立場維拉公園球場進行一場過附加賽，決定邊隊以聯賽季軍身份直入來屆歐聯分組賽。