山葉爭出線掃平風林

猪拉多纳

日本聯賽盃上演最後一輪分組賽，B組鹿島鹿角及大阪櫻花已篤定雙雙晉級，今輪交手只屬榜首之爭。至於A組頭三位爭兩個出線席位，三哥磐田山葉主場對甲府風林唔贏唔掂，山葉今季主場兩戰盃賽全勝，可望再下一城！

（周三晚6時開賽）

睇番A組形勢，榜首橫濱水手甩開第三位磐田山葉3分，今輪只需再添1分就可晉級，作客讓波唔多抵玩。次名川崎前鋒作客湘南比馬贏波就可出線，決心極大，由於對手已經出局，前鋒贏面確實較高。至於山葉形勢頗為被動，就算贏波都未必肯定出線，要望川崎前鋒失分，自己仲要爭氣贏波先有價講，無論點都好啦，先要做好本分全取3分，否則咩都唔使講！
踢盃賽主場特醒

磐田山葉中前場人腳勁，除日本國腳級射手前田遼一，仲有山崎亮平、金園英學及山田大記等當打球員，論人腳可企穩日職中上游，但班波開季於聯賽踢落唔順，目前位列下游，戰績甚曳。山葉轉戰盃賽發揮明顯較好，聯賽盃分組賽主場兩戰全勝，包括以5比1大炒清水心跳，今戰應可順利再贏。