歐聯決賽馬圈也瘋狂 騎練齊齊撐拜仁

猪拉多纳

歐洲聯賽冠軍盃決賽拜仁慕尼黑對多蒙特，將於香港時間周六深夜上演，雖然翌日沙田有日賽進行，但馬圈中不乏足球發燒友，他們齊齊表示不惜捱夜、會校定鬧鐘起身觀賞賽事。其中馬會行政總裁應家柏、練馬師高伯新、伍碧權，以及騎師薛寶力一眾標準球迷，對這場歐聯決賽睇法一致，認為拜仁慕尼黑可捧盃而回，大家不妨看看他們的分析是否專業？
       
周六歐聯決賽兩支德國球隊「內訌」，拜仁慕尼黑（紅衫）普遍備受睇好。
應家柏：拜仁2：1

今屆歐聯為德國球隊天下，對於來自德國兼對球壇有一定認識的應家柏及薛寶力當然最為關心，應家柏說：「今屆歐聯四強，拜仁慕尼黑與多蒙特首回合分別大比數擊敗西班牙兩支勁旅巴塞隆拿與皇家馬德里，雙雙殺入決賽，贏來極具說服力，證明德國足球目前已經處於全歐洲最頂級水平，因此即使周六決賽只係同一國家嘅球隊對決，相信一樣會精彩萬分。
       
德國幫熟路
應家柏

賽前坊間幾乎一面倒睇好拜仁慕尼黑，但多蒙特中場有兩位我好欣賞嘅新星馬高列奧斯同馬里奧葛斯坐鎮，絕對不落下風，預期比賽形勢相當緊湊，勝負只會係一球上落，心水波膽係拜仁勝2比1。」
       
薛寶力
薛寶力：多蒙特有隱憂

薛寶力：「好多德國著名球員本身亦係馬主，所以喺德國策騎多年嘅我，私底下同唔少球星相當稔熟，甚至有時一齊踢波為樂，好似前國家隊隊長馬圖斯、夏文都係我多年老友。拜仁慕尼黑現任隊長拿姆，亦係一名愛馬之人，喺我一個相熟馬房養有數匹賽駒，祝願佢後晚順利帶領球隊捧走歐洲冠軍獎盃。
       
標準球迷
高伯新

以我嘅分析，拜仁慕尼黑捧盃機會幾高，雖然後防大將畢斯杜巴喺聯賽煞科戰受重傷，但依然有丹迪、雲拜頓同拿姆在陣，實力尚算完整。相反多蒙特後防支柱曉姆斯煞科戰整傷左腳，據知雖然唔算太嚴重，若然帶傷上陣，防守力肯定會大打折扣，睇怕難以抵擋拜仁強大攻擊力。」
       
伍碧權
高伯新最愛列貝利

高伯新：「我由細到大都係紐卡素球迷，而之前就喺法國做練馬師多年，所以對英、法兩地足球都相當熟悉，至於德國波就較少留意。德國足球講求團體合作，少講個人主義，這一點同訓練馬匹一樣，每一場頭馬都係經過全體員工嘅努力，並唔單係騎師同練馬師功勞，呢樣係我最欣賞嘅地方。

後晚溫布萊球場上演歐聯決賽，單論整體性，拜仁無疑係較強嘅一隊，幾乎每個位置嘅球員都識得入波，攻力有保證；相反多蒙特有時候太過依賴羅拔利雲度夫斯基製造入球，如果臨場一時腳風唔順，有機會出現番八強，幾乎被馬拉加踢出局嘅場面。另外，拜仁翼鋒列貝利以前効力馬賽嗰陣，我已經好鍾意睇佢踢波，希望佢今次可協助球隊奪冠。」

伍碧權估計賽果正路

伍碧權：「拜仁慕尼黑同多蒙特今季歐聯表現出色，令人出乎意料，四強分別擊敗兩支西班牙勁旅，雙雙進身決賽，相信好多球迷同我一樣大跌眼鏡。星期六晚歐聯決賽，兩隊都好熟悉對方嘅球路風格，以往績計，兩隊互有勝負，而喺一場過盃賽場合，賽果隨時有驚喜，早排英格蘭足總盃韋根爆冷擊敗曼城就係最佳例子。不過，我份人鍾意正頭正路，拜仁慕尼黑無論近況，今季得、失球數字都比多蒙特優勝，我睇應該可以順利奪冠。」