溫布萊中立場乜都有可能

猪拉多纳

歐聯決賽今晚會喺倫敦溫布萊球場上演，而今屆有歷來從未出現過嘅德甲內訌決賽組合。雖然拜仁慕尼黑封「三冠王」呼聲高唱入雲，但多蒙特都係要過五關斬六將先可以殺入決賽，實力唔應該忽視，所以讓球主客和嘅主勝要得過。
「反拜仁大聯盟」撐多仔

前幾年小妹因為經常畀拜仁所累輸錢，於是成立咗「反拜仁大聯盟」！但今屆表現又實在唔讚唔得，佢哋喺聯賽完全係法拉利鬥日本車，早早飛甩對手，快到唔見車尾燈！喺歐聯四強亦「慨贈」七蛋畀「地上最強」巴塞隆拿，霸氣盡現。不過呢啲好成績係用唔少錢去打造嘅，據聞全拜仁球員身價值4.32億歐元，仲未計下季加盟嘅馬里奧葛斯呢，所以成績好係理所當然！

依家歐聯決賽踢中立場，兩邊都無地利。拜仁今季連同盃賽四次對多蒙特兩勝兩和，所贏兩次都係喺主場，仲要係煲魚生粥僅熟。其實兩隊對過咁多次，已經熟晒路，好難大炒對手，所以拜仁讓到半一都嚇我唔倒！
屢破強敵 高普有計

呢邊拜仁想用「三冠」做禮物歡送軒歷基斯，但多蒙特又何嘗唔想用歐聯錦標嚟報答教練高普？多蒙特同上季相比，喺歐聯表現直頭大躍進，分組賽遇上強勁對手都可以榜首出線，四強時更淘汰皇馬！唔好忘記佢哋嘅班費遠唔及拜仁！條件無咁勁都踢得咁好，多蒙特要重溫1997年再做「歐洲王者」都唔係無可能。

兵力方面，馬里奧葛斯肯定缺陣，但佢都傷咗好耐，相信高普已有對策，拜仁就無重要傷兵。若果同我志同道合捧多蒙特嘅，可以投X埋多蒙特冠軍，有2.92倍左右！今晚記得黐實球彩台睇歐聯直播呀，我同阿鵬、阿聲同大頭會同大家一齊睇波！