賓菲加「-1」炒鑊甘

猪拉多纳

連失兩盃成肚火

葡萄牙盃決賽於中立場奧爾拉斯國家球場舉行，由賓菲加對甘馬雷斯，賓菲加今季真係慘情，季尾連失歐霸盃及聯賽錦標，如今谷埋一肚氣勢必搵人出氣，轟轟烈烈贏場漂亮勝仗捧盃收咧。甘馬雷斯實力至少低兩班，今季聯賽兩循環共吞賓軍7蛋，勢成賓菲加洩憤沙包，Mic少強捧「讓球主勝」。

（有線155台周一凌晨零時15分直播）

賓菲加今季表現一路出色，一度可問鼎三冠王，但踏入月中情況急轉直下，先係聯賽尾二一輪補時被波圖反勝，最終被對方以一分之微搶走冠軍。及後歐霸盃決賽同樣佔上風下，補時失波輸畀車路士，一周失兩冠，難免令人沮喪。不過，賓菲加始終係班霸，球員富榮辱感，遇上挫折往往更能激發球員鬥心，絕對唔會接受四大皆空結果，鬥心毋須懷疑。
甘馬雷斯實力差兩班

講實力，賓菲加起碼高甘馬雷斯兩班波，今季聯賽兩循環，先係主場贏3比0，作客再炒對手4球，視甘馬雷斯如無物。更何況賓菲加跌咗兩隻盃後，渴望奪冠程度已達到極點，贏得少都對唔住自己同球迷喇！

甘馬雷斯可以打入決賽，好大程度因為抽到好籤，晉級過程頻遇弱隊，4強對手只係葡甲球隊比蘭倫斯，靠運氣多過實力，來到決賽已經超額完成，向球迷有晒交代。仲有一點要留意，由於賓菲加將出戰下屆歐聯，令甘馬雷斯已穩奪歐霸盃資格，球隊上下都應該心足，戰意遠不及賓菲加，預料甘馬雷斯今場輸兩球或以上好正路。