里昂爭玩歐聯盡地一煲

猪拉多纳

法甲今晚上演最後煞科戰，十場比賽同時間開波，焦點落在最後一張歐聯入場券之爭，以及邊隊陪比斯特、南錫降班。目前排第三嘅里昂只要全取三分，便毋須理會其他賽果，肯定搶得下屆歐聯參賽資格，由於對手係晨早冇嘢好爭、兼且下半季表現嚴重跌Watt嘅雷恩，波童捧「讓球主勝」。

（周一凌晨3時開賽）

先講歐聯席位之爭，數字上排第三至六嘅里昂、聖伊天、里爾及尼斯仲有機會角逐，但由於里昂領先尼斯三分兼有十二個得失球差，尼斯基本上可以提早宣布投降。里昂除咗積分上有優勢，對手雷恩近況超曳亦對佢哋有利。雷恩自從中場靈魂阿歷辛迪尼於二月時重創提早收咧，之後十二場聯賽只得一勝，而且於法聯盃決賽亦不敵聖伊天屈居亞軍，士氣接連受挫。里昂為保前三戰意遠勝對手，有力大勝一場兼向主場球迷謝幕。

另外兩支角逐前三嘅球隊里爾、聖伊天正面硬撼，里爾除要自己贏波，仲要望里昂全失三分，先有機會憑得失球差壓過里昂；聖伊天因為已奪法聯盃冠軍，至少穩奪歐霸盃參賽席位，如果佢哋作客擊敗里爾，同時間里昂於雷恩身上失分，聖伊天便可趕過里昂「升格」踢歐聯，對里爾、聖伊天嚟講目標都係全取三分，隨時出現對攻局面，首選大盤。

（now 714周一凌晨3時直播）
特魯瓦讓波捧對家

護級方面，比斯特及南錫篤定降班，排尾三、僅得三十七分嘅特魯瓦形勢最危殆。排十五至十七位嘅伊維恩、阿些斯奧及索察同得四十分，由於伊維恩、阿些斯奧得失球差大幅領先，特魯瓦唯一寄望係索察輸波而自己贏波。但以特魯瓦十八場作客僅得兩勝嘅水準，要在華倫西恩斯身上全取三分絕唔容易，「讓球主客和」客軍讓一球，必捧「讓球主勝」。