洛達留前鬥後主場發威

猪拉多纳

歐洲主流聯賽去到尾聲，邊隊有目標兼夠鬥心嘅話，值得睇高一線，阿King對洛達主場迎戰鹿特丹斯巴達甚有興趣。呢場荷蘭聯賽附加賽決賽次回合，將決定邊隊能獲得荷甲席位，洛達唔單止經驗較豐富，仲好鍾意留前鬥後，首回合成功悶和對手，返主場必定施展渾身解數，「讓球主勝」非常值博。

（周日晚8時30分開賽）
炒得起鹿特丹斯巴達

今季於荷甲淪為尾三，冇影響洛達在附加賽嘅演出，就以上一圈對迪加史卓普為例，首回合作客完場前逼和對手以為冇料到，點知係扮豬食老虎，次回合返主場大炒迪軍六個一皮，射手馬爾基更大演帽子戲法。今仗情況如出一轍，洛達在上周決賽首回合作客成功頂住鹿特丹斯巴達嘅狂轟猛炸，最終互交白卷，論實力、經驗及往績，洛達明顯勝一籌，為留番喺甲組，今晚返自己地頭必如猛虎出柙，應該唔只贏一粒，一於捧「讓球主勝」。
串白蘭恩紐維爾舊生

挪超方面，「主場王」白蘭恩前鋒基斯杜化拿臣將取代拜特芬尼出任正選，該隊上仗作客不敵特林素，延續其聯賽「主勝客負」嘅攤路，今返主場迎戰近況下滑嘅薩普斯堡，又係起筷時候，主勝穩開。最後阿甲紐維爾舊生主場對小保加，雙方連埋自由盃六日內三度碰頭，小保加劍指自由盃懶理聯賽，今仗一定收起主力hea踢，預計一哥紐軍可輕取對手，主勝好路。