講波年中無休一樣享受

猪拉多纳

以前成日都話「五窮六絕」，因為踏入五、六月各國球季開始收咧，紛紛進入歇暑階段。不過，時代唔同晒喇，喺今屆歐霸、歐聯相繼落幕後，世界盃外圍賽、國際熱身賽、世青盃、洲際國家盃亦接踵而至，其中洲際國家盃作為明年世界盃嘅重要綵排，巴西都希望喺球場、保安、交通配套等安排，可以做到盡善盡美，精彩可期。
熱火有占士冇得輸

去到七月，各項熱身賽、歐聯及歐霸外圍賽相繼出籠，其中四支英超球隊亦會大軍壓境，先有熱刺、曼城、新特蘭來港參加巴克萊亞洲錦標賽，之後「紅魔鬼」曼聯會同傑志打表演賽，香港球迷一定興奮到暈。正所謂好波停不了，對於講波佬嚟講，真係年中無休，紅假多數冇你份，但英國著名評述員馬田泰萊曾經講過，能夠為精彩刺激嘅球賽做評述，絕對係一份賞心樂事嘅優差，所以Peter同佢一樣，就算大時大節返工，都要懷住敬業樂業嘅心情去享受過程，唔好抱怨咁多，努力為球迷評述好波。

除咗足球之外，一樣深受歡迎嘅NBA季後賽亦進行得如火如荼，Peter認為喺呢個階段，邊隊主將冇受傷患困擾，邊隊就能夠奪得總冠軍，雖然東岸決賽熱火同溜馬目前打成場數1比1，並且表現麻麻，但有超級球星勒邦占士領導之下，Peter相信東岸冠軍應該走唔甩係熱火。

至於西岸決賽馬刺人強馬壯，又有演出穩定嘅老大哥鄧肯壓陣，加上輕輕鬆鬆領先緊2比0，睇嚟對手灰熊好難偷到雞囉！
金句：再冇體育（足球）歇暑嘅日子！