安甲唞夠威力強

猪拉多纳

　　每位練馬師都有一位心腹殺手，例如蔡約翰喜用韋達，告東尼則鍾情蔡明紹，或葉楚航倚重潘頓等，總之一人有一個愛將，每到搏殺關頭就攜手出擊！

　　講時講，高伯新近期與杜利萊如膠似漆，高廐凡有靚馬，總落入阿萊手中。就講上次賽事，高伯新全日出馬四匹，「卡加大師」配薛寶力，結果輸到冇影，反之「精彩生輝」、「旅遊尖子」與「皇仁威龍」起用阿萊，則全部跑入位置。

　　事實擺在眼前，高伯新每次準備郁手，阿萊必定挺身而出；或從另一角度睇，就是阿萊選騎的高廐馬匹，當可視為出擊信號！環看明晚賽事，兩者又憑第四場「常盈多」和第八場「安甲」合作，二人可否再創佳績？贏輸暫且難以預料，然而前車可鑑，買條二串三試試應冇蝕底！

　　先講「常盈多」，此駒日趨勇熟，五歲馬上仗終於贏馬開竅，沒理由一擊得手後即刻收工。今升上四班負磅驟減，同時抽得二檔靚位，計條件較剛戰更理想，今場對手統統似是而非，反之此駒方興未艾，當起馬信得過。

　　至於「安甲」向來利跑新鮮，季內一出即上名已是最有力證據。今次距上賽有近個半月時間，唞夠出擊宜看高一線！