德乙附次回合 撐地頭龍特雷斯登

猪拉多纳

60年代至80年代末，曾經喺德國球壇叱咤一時嘅特雷斯登近年淪落至第3、4級聯賽，上季幾經辛苦升番上德乙，今季又話要踢留級附加賽，認真慘情。今晚佢哋喺德乙附次回合主場迎戰奧斯納貝克，小妹相信呢支主場戰績彪炳嘅昔日豪門，有力收復首回合輸0:1嘅失地，1.75倍主勝值捧。

（開賽時間：周三凌晨2:30）
奧斯納貝克作客例失波

無可否認，特雷斯登今季喺德乙嘅戰績唔多理想，上仗喺附加賽首回合作客又不敵丙組嘅奧斯納貝克，不過，小妹唔認為特雷斯登會就此降番落丙組！事關呢班波作客同主場嘅表現可謂差天共地，作客17戰衰到贏得1鋪，但一返到主場，特雷斯登就龍咁威，最尾8輪地頭出戰贏足6場，射手福特去到季尾仲回勇喪入波，呢支昔日豪門大把本錢反勝對手，保住德乙席位。

係，對家奧斯納貝克今仗肯定會玩死守，只可惜以呢班波嘅作客戰績去計，要守住個領先優勢絕對唔易，事關佢哋同特雷斯登一樣，作客例牌腳軟，條防線連續5場客戰都有失波，今鋪攻又唔係守又唔掂，好易出事o架。

首回合：特客負0:1
德乙附賽制

採主客兩回合制，今輪為次回合，總比數相同的話，作客入球較多一隊勝出，再和就喺次回合後加時作賽，加時仍然計作客入球，若再冇交收，就互射12碼分勝負。