三獅兵打殘愛爾蘭

猪拉多纳

朗尼搵新老細踢好波

溫布萊球場今晚有好戲上演，英格蘭主場對愛爾蘭雖然唔齊腳，但王牌朗尼扭計離隊後餓波咁耐，照計會好恨入波。消息仲話朗尼被曼聯新領隊莫耶斯放飛機，暫時前程未卜，為咗搵新老細，有得做隊長梗係要踢番場波好啦，捧2.10倍「讓主」！

（now635台、廣東體育周四凌晨3:00直播）

雖則英格蘭有大堆球員因傷唔能夠候命，但其實得隊長謝拉特同中場韋舒亞最大影響，其餘位置根本唔憂冇人用。數吓手指，自從朗尼提出離隊消息見街，佢已經接近成個月冇比賽，以往佢落親場都唔錫力，今場難得有機會再做國家隊隊長，又點會Hea踢呀？最低限度，佢都想入波賀吓最近個細仔出世啩？
神童餓波成個月搏晒命

事實上，《曼徹斯特晚報》尋日雖然話莫耶斯決意留低朗尼，不過佢兩個始終冇見過面。即係話，未來3個星期莫帥放大假，朗尼都唔肯定曼聯到底要留佢定賣佢，既然係咁，當然要把握機會吸引潛力買家，事關車路士同阿仙奴都想簽佢嘛。再講，今場英格蘭對手只係愛爾蘭，朗尼唔需要兼顧太多防守工作，全心全意入波隨時半場未夠就有斬獲。
羅比堅尼趕披甲狀態成疑

另一方面，愛爾蘭主要有射手奇雲杜里養傷，中堅李察鄧尼長抖後未必趕得切好番上陣，實力已經打折扣。最慘就係，隊長兼射手羅比堅尼原本被洛杉磯銀河留難，以為唔可以歸隊，最後銀河又突然改變主意，搞到佢臨急臨忙要由美國趕去倫敦踢波，咁樣搞法狀態唔慌好，佢唔掂嘅話等於愛爾蘭冇埋最後偷雞希望。
英格蘭半場5連勝

英格蘭連續5場半場領先對手。

英格蘭近7場讓球主客和得2次贏盤。

愛爾蘭近5場有4次開半場入球細。

88年至91年連續3次對賽踢成1:1，同時連續4次交手開入球細。
英超兵抖緊暑宜捧細

愛爾蘭牌面輸蝕，作客英格蘭睇落係死守輸少當贏格局，甚至唔似入到波，除非英格蘭領隊鶴臣突然轉性嗌球員搶攻，否則呢場波唔似開到入球騷。畢竟英超已經收咧，部分英格蘭球員狀態成疑，如果愛爾蘭冇波入，等於要英格蘭一手包辦3球至開到入球大，所以玩1.95倍入球細都係唔錯嘅選擇。