日本強勢劏保加利亞

猪拉多纳

海歸派悉數歸隊

今晚國際熱身賽，東亞勁旅日本喺主場迎戰歐洲二流隊伍保加利亞，前者已非「吳下阿蒙」，今番更坐擁十四名「海歸派」球星壓陣，話呢支係史上實力最強嘅東瀛大軍亦不為過，相反保加利亞仍靠霉到爆嘅「永遠天才」保積洛夫，青黃不接情況非常嚴重，主Ｗ乃不二之選。

（有線61及201台周四晚6時20分直播）

雖然話係為下周中世界盃外圍賽火併澳洲練兵，但日本只要多取一分，便能鎖定明年世盃決賽周入場券，反而為備戰六月嘅洲際國家盃，教頭沙哲朗尼相信今次會強陣出擊。事實上，沙帥特登徵召咗十四位外流球星，包括大家熟悉嘅香川真司、長谷部誠、內田篤人、吉田麻也等，連剛傷愈嘅本田圭佑及長友佑都亦歸隊，幾乎可砌出十一人嘅正選名單，而且大部分都喺所屬嘅歐洲球會穩佔主力，單係閘位就有長友佑都、酒井高德、酒井宏樹、內田篤人可供差遣，加上湧現出夏雲拿般極具衝擊力嘅高大中鋒，實力之強可見一斑。
保加利亞青黃不接

保加利亞上次殺入大賽決賽周，已經係2004年歐洲國家盃嘅事，今屆佢哋喺世盃外B組六戰未輸過暫列次席，但表現唔算突出，保軍召用今季喺愛斯賓奴踢得僅八場嘅馬田柏杜夫，以及淪落到喺意乙搵食嘅保積洛夫，其中後者多年來受盡傷患折磨，已經冇晒當年神童嘅風采，仲要靠佢哋可見球隊嘅「斷層」問題，加上日本之前贏過勁旅法國，試問呢支史上最強嘅「東瀛兵團」，點會怕人才凋零嘅歐洲二線尾球隊保加利亞呢？一於扒住飯捧主Ｗ喇。