拉科「+1」歡送華拿朗

猪拉多纳

煞科日撲擊蘇斯達保命

今晚西甲煞科日，雖然巴塞早已封王，但仍有懸念未解，最激嘅梗係榜尾拉科魯尼亞、切爾達、薩拉戈薩、馬略卡四隊只能活一隊喇，未鬥到最後一刻，都唔知邊隊能夠逃出生天，其中拉科喺主場硬撼力爭前四嘅皇家蘇斯達，亦極可能係拉科名將華拿朗嘅職業生涯最後一仗，由於佢哋贏波便可護級成功，眾將都想用勝利歡送呢位老將，為人為己必定搏甩髀，有得受讓之下，「讓球主勝」捧得過。

（now 633周日凌晨3時直播）

雖然榜尾形勢十分複雜，不過尾四嘅拉科只要擊敗蘇斯達，就毋須理會其他護級對手嘅任何戰果，可以留番喺甲組，賽前拉科中場華拿朗宣布踢埋呢場好大機會掛靴，佢講到明話想幫球隊護級成功，呢位37歲老將不但經歷過拉科嘅輝煌，就算上季淪落乙組亦不離不棄，因此喺陣中德高望重，大家都希望完成其最後心願，無疑給予眾將額外嘅動力。

當然蘇斯達並非善類，一度穩坐前四位置，實力強勁，但上仗遭皇馬逼和後，畀後上嘅華倫西亞以2分反壓，搶前四拿歐聯入場券完全處於被動，若今仗途中收到有關華倫贏波嘅消息，對球員比賽心態勁有影響，隨時變成洩氣皮球，咁多變數之下，有地利、有戰意嘅拉科仲有得受讓，非常着數，「讓球主勝」不容錯過。
西維爾華倫射手王「大」對決

至於西維爾主場迎戰「蝙蝠兵團」華倫西亞，亦係尼格度同蘇爾達杜爭逐本土射手王嘅對決，前者依家落後一粒，加上落選西班牙征戰洲際國家盃嘅大軍名單，谷埋成肚火，誓要藉地利攞番個尾彩，但蘇爾達杜近七仗轟八球腳風超順，況且佢只係進入「鬥牛國」嘅初選名單，隨時會被踢走，因此仲要加多兩錢肉緊爭取表現，兩大射手駁火揀大盤。「蝙蝠兵團」難得爭前四搶到主動權，「錢」途攸關，相信佢哋唔會畀機會溜走，不妨要埋客W。

（now 632周日凌晨3時直播）