拜仁搶盃 3冠王登基

猪拉多纳

恰慣史特加 歡送軒歷基斯

德國盃決賽今晚喺柏林奧運球場上演，拜仁慕尼黑對史特加當然唔會留情，佢哋唔單只要創造歷史首次登上3冠王寶座，仲要歡送離隊嘅教頭軒歷基斯。而且專家話拜仁完成任務，出年營業額會勁升1.3億歐元（約13億港元），「-2」都要捧2.25倍「讓球主勝」！

（無綫翡翠台周日凌晨2:00直播）
近4次交手最少贏2粒

原來拜仁嘅光輝歷史中，從未試過成為3冠王，今場戰意當然無限，又係教頭軒歷基斯功成身退最後一戰。佢哋喺歐聯決賽完場前絕殺多蒙特後，全隊又信心大過天，講到底拜仁近4次對史特加至少淨勝兩球，今季聯賽主場仲贏夠6:1，冇理由呢個時候會o趙唔低史特加。做得球員，有邊個唔想自己個名成為球會歷史一部分呀！
信心爆棚放森巴雙星服兵役

睇好拜仁仲有一個原因，開波前佢哋試過向巴西足總提出，延遲中場路爾斯古斯達禾同中堅丹迪返國備戰洲際國家盃，點知見到對方企硬，拜仁索性費事煩放走晒佢哋，如果高層唔係有必勝嘅把握，又點會咁易妥協先？咁講真，依家拜仁後備力量雄厚，對住史特加咪當讓兩件囉，咪唔記得，開季到依家佢哋得1場波冇波入咋！

仲有呀，3年前拜仁年度營業額突破3億歐元大關，今年去到4億歐元，慕尼黑經濟學家估計，只要拜仁成為3冠王，出年營業額會暴升至5.3億歐元，有名又有利唔搏甩髀至奇。另一方面，史特加教練拉巴迪亞球員時代都効力過拜仁，或者會有啲備戰心得，可惜依家佢哋淨係靠翻生射手伊比斯域孭飛，好難惡得出樣喎！
史特加8戰半場不敗

拜仁慕尼黑過去18次入決賽15次捧盃。

拜仁近15場得14勝1和。

史特加5次入決賽3次封王。

史特加近8場未試過半場落後，4次領先、4次打和。
拜仁快入局博埋半場大

拜仁近排入球停不了，而且好易入局，對上10仗有7場上半場有波入，既然今場對手史特加牌面輸晒，睇怕信心爆棚嘅拜仁唔會有後顧，好可能一開波就撳住狂砌，上半場入夠兩粒開半場入球大唔難，而且半場入球大有1.9倍，比起讓球主勝「-2」嘅2.25倍，賠率唔差太多咋！