寸王告別戰爭口氣

猪拉多纳

皇馬半場大最抵玩

今晚係「寸王」莫連奴最後一次指揮「銀河戰艦」，雖然呢場皇馬迎戰奧沙辛拿嘅比賽係例行公事，但話晒喺主場踢煞科戰，「皇馬」點都要入多兩球氹吓球迷嘅，若果嫌「讓主」得1.43倍冇肉食，不如轉捧1.77倍「半場大」啦！

（now632台周六晚11:00直播）
奧沙辛拿5主力打柴

「銀河艦隊」今季痛失聯賽同西班牙盃，以莫帥心高氣傲嘅性格，梗係唔想自己嘅告別戰失禮人啦！落實季尾離隊嘅「寸王」，好可能會落柯打希望炒起「奧沙」當禮物，送畀勁唔妥佢嘅球迷。上仗休息嘅守將沙治奧拉莫斯同法比奧干查奧，今晚極有機會復出，加上有賓施馬、希古恩、卡卡等攻擊好手壓陣，即使仲未知C朗踢唔踢，但要整場「入球騷」相信唔難。翻查紀錄，皇馬對上2季主場謝幕戰對馬略卡、艾美利亞，半場就分別領先2:0同2:1，計落「半場大」抵玩過中位數3.5球、但得1.68倍嘅「全場大」好多。

對家奧沙辛拿嚟到季尾無欲無求，作客仲例牌唔掂，佢哋近兩場作客對CF格蘭納達同華倫西亞一共吞咗7隻蛋，就知成班球員戰意一般，而且佢哋今仗殘陣出擊，前鋒連奴、中場安蘭、守將盧奴等5件主力踢唔到，睇怕都係阻唔到皇馬「開騷」o架喇。