以色列唔易攞頭威

猪拉多纳

近屆主辦國首戰冇着數

揭幕戰A組分組賽，主辦國以色列U21鬥挪威U21，有主場之利固然好，但傳統以來U21賽事入場球迷較少，而且主隊冇突出新秀，相信球迷打氣力量有限。近屆丹麥、葡萄牙雖為主辦國，但首戰都輸波，挪威U21憑較強人腳、經驗，受讓正爆。

（周四凌晨零時開賽）
挪威人腳經驗佔上風

以色列不嬲唔係足球強國，以往亦只有1次打入U21歐國盃決賽周，今次以主辦國身份參賽，相信只有「主場」一個有利因素。以色列年輕球員實力麻麻，今次入選名單只有柯特曼一個効力富咸，其他都係國內球員，根本未見過大場面。睇番近屆主辦國成績，上屆丹麥、06年葡萄牙、04年德國都於分組賽出局，前兩軍於首仗都落敗。事實上，07年荷蘭同09年瑞典，本身已經係勁旅，所以先可以突圍而出，故今次以色列U21實難有作為。

挪威U21方面，今仗雖有祖舒亞京治、華倫貝利沙、馬古斯軒歷臣等被大國腳徵召而缺陣，但進攻大將、飛燕諾中場星治有卡士，而些路迪中堅湯馬斯洛尼亦信得過，挪威U21喺外圍賽雖然只係得次名要踢附加賽，但佢哋能夠兩回合計以五比四擊敗法國U21，賽績值得尊重，而且挪威年輕球員體格普遍較大隻，即使技術唔夠細膩，都可以體力搭夠，受讓值捧。