德國撞荷蘭玩大盤最啱

猪拉多纳

日耳曼尖刀開鋒批橙皮

喺以色列舉行嘅U21歐國盃上演「死亡B組」首輪分組賽，由荷蘭U21火併德國U21。兩支世仇勁旅陣中均有不少高質素攻擊手，而且小國腳防守意識較薄弱，有利雙方爭取士哥。基於同組仲有上屆冠軍西班牙及實力分子俄羅斯，故每場比賽都要當決賽踢，一旦打開紀錄入球隨時陸續有來，首選1.88倍大盤。

（now 633及635周五凌晨2時30分直播）
低潮過後強勢反彈

叫得做「死亡之組」，B組各隊實力當然有番咁上下，荷蘭、德國、西班牙分別係過去4屆U21歐國盃冠軍，俄羅斯又有上年歐國盃神射手迪沙高耶夫壓陣，因此每一分都足以影響整個出線形勢，可以預期場場都係戲肉。荷蘭U21連贏06及07年兩屆冠軍後即陷入低潮，過去兩屆甚至未能打入決賽周，成績認真麻麻。

不過，「小橙軍」近年痛定思痛，今屆捲土重來卻氣勢逼人，除於外圍賽（連附加賽）10戰取得8勝1和1負佳績，陣中嘅盧克迪莊、韋拿杜姆及史杜特文都已進身大國腳，論實力及個人質素絕對係爭標分子之一。
外圍賽入球冠全歐

德國U21外圍賽攻入43球為全歐之冠，由熱刺中場賀治比、慕遜加柏前鋒穆拉柏及賀芬咸射手禾蘭領導嘅鋒線極具侵略性，不過德國近年無論大、小國腳都崇尚進攻，防線略欠穩健。好似呢支U21於今屆外圍賽對住希臘、波斯尼亞都曾經試過單場失4球，後防有幾鬆散大家有眼睇，面對攻力有番咁上下嘅荷蘭，想保持清白之身都幾難。

從兩軍踢法、戰績嚟計，大家同屬攻強於守，預計今場入波唔會少，大盤有接近2倍分頭，相當值博。