國足難讓烏茲別克

猪拉多纳

恒大孖寶曾誠 張琳芃有傷

無緣進軍明年世盃決賽周嘅中國國家隊，趁住國際賽賽期，10日內安排咗3場熱身賽，其中今晚會喺內蒙古呼和浩特體育中心主場迎戰烏茲別克，礙於國足有兩大重心鄭智同孫祥缺陣，加上恒大防線孖寶曾誠同張琳芃都有傷在身，上陣成疑，陣容不整下仲要讓波，梗係捧1.7倍「讓客」好過啦！

（中央5台周四晚7:35直播）
烏茲靠賓約哥球員孭飛

國足踢完今晚賽事，嚟緊禮拜二會去到北京同荷蘭拍跳，下周末就喺合肥出戰泰國，由於始終只係熱身賽，球員鬥志唔慌好。事實上，就連隊中兩大主力鄭智同孫祥都已經獲准周五先歸隊，就知主帥甘馬曹對今場波有幾重視啦！再者，球隊正選門將曾誠根本有傷在身，後防悍將張琳芃日前又練波受傷，兩人都未必落得，單靠傷愈冇耐嘅馮瀟霆孭飛，後防有隱憂o架，就算話前面郜林同于大寶狀態唔曳，隨時入埋都唔夠輸。

烏茲別克呢邊，嚟緊周二要踢場世盃外圍賽大戰火併南韓，雖然話班人要小心唔好受傷，但同時都真係要谷起狀態預備搏命。睇番佢哋大軍名單，合共7名球員來自班霸賓約哥，另外喺城南一和搵食嘅迪積佩洛夫同安治嘅阿美度夫都有份，強陣出擊，以佢哋世界排名都高過中國32位去計，實力有優勢，受讓下當然抵玩。