C朗咁Hea葡萄牙點讓俄羅斯？

猪拉多纳

今晚世界盃外圍賽歐洲區，焦點必屬F組葡萄牙主場對俄羅斯，由巨星基斯坦奴朗拿度領銜嘅葡萄牙出線形勢告急，爭勝心毋須懷疑，最弊C朗近期球場內外負面新聞多多，有輕傷之餘，仲掛住蒲吧，似乎心態上已經抖緊暑，當國際賽冇到，加上轉會傳聞滿天飛，前途未明隨時影響心情。俄羅斯由名帥卡比路領軍下，凝聚力強，外圍賽4戰全勝兼冇失波，可望全身而退，受讓可取。

（中央5台周六凌晨3時45分直播）
星級陣容冇火花

葡萄牙表面上僅落後榜首俄羅斯1分，但踢多兩場，爭首名直接出線形勢悲觀，加上同分嘅以色列異軍突起，葡萄牙攞次名踢附加賽都唔容易，惟有場場搏盡。不過球隊近況積弱，近6戰僅於3月贏過弱隊阿塞拜疆2比0，表現令人失望。今仗想搶分仍只能繼續靠C朗，但佢搏咗一季，季尾開始受傷患困擾，已缺席西甲煞科戰，就算今仗披甲，亦未必可以發揮最佳水準。C朗近日返回葡萄牙，被影到通宵夜蒲，對今場大戰唔多上心，加上有傳佢向皇馬要求加薪被拒鬧轉會，佢份人咁情緒化，或因此而影響表現。事實上，葡萄牙因有C朗、拿尼、摩天奴及法比奧干查奧等球星在陣，經常被高估，可惜佢哋夾埋一齊往往擦唔出火花，難以令人信服。
卡比路重用俄超土炮

俄羅斯上年7月聘請意大利籍金牌教頭卡比路執教，成績大為改善，水準非常穩定，今屆外圍賽4戰全勝，兼冇失波，包括首循環贏葡萄牙1比0。卡比路重用俄超土炮，今次大軍名單中球員全部來自俄羅斯本土球隊。呢班兵星味欠奉，因此聽教聽話，願意為國賣命，博打出名堂，獲大球會垂青。加上主力陣容由辛尼特及莫斯科中央陸軍球員組成，默契唔使擔心，有助發揮整體戰威鬥力。再者俄羅斯簡單實用踢法，正好剋死葡萄牙嘅花拳秀腿，相信作客可坐和望贏。