比利時再炒塞

猪拉多纳

全民力撐世盃夢

近十年來，足球從未試過像呢一刻咁受比利時人民關注，全國對國家隊充滿期望同支持，深信球隊可以進軍明年巴西世盃決賽周，今晚比利時喺世盃外圍賽歐洲區A組主場對塞爾維亞，Anton對主隊信心十足，主Ｗ可視為過關重心，單頭捧埋比利時「讓球主勝」。

（廣東體育頻道周六凌晨2時45分直播）

今場賽事安排喺布魯塞爾帝王球場舉行，可容納逾四萬五千球迷，公開售票即出現長長人龍，開售僅一小時即宣布沽清，大批球迷失望散去，唔少球迷迫於買黃牛飛。球隊自從喺美國集訓回國後，首課操練都有二萬球迷到場支持，呢種狂熱真係好耐好耐都未試過。
改打雙箭效果奇佳

比利時喺美國進行咗一星期集訓，期間4比2擊敗東道主美國踢出亮麗足球，全場佔優，我認為賽果應該係5比1更加合理。比利時目前喺陣式上亦有轉變，已經由原來嘅433改為442，前線由「比利時雙熊」盧卡古同賓迪基拍檔威力更勝之前嘅三前鋒，球隊對今場三分志在必得，更希望以大比數勝出，皆因目前同克羅地亞並列榜首，要爭唯一嘅直接出線名額，得失球隨時成為關鍵。

賽前記者會上，領隊韋莫斯話中場大將夏薩特因傷上陣成疑，但我認為係佢愚敵策略，夏薩特今仗上陣機會其實相當樂觀，至於中堅華美倫因傷缺陣，但有歐聯冠軍正選雲拜頓取代佢，對防線根本冇影響。
塞爾維亞級數差太遠

由名將米赫洛域領軍嘅塞爾維亞，基本上出線無望，好多球員都有放暑假心態，佢哋首循環主場淨吞比利時三蛋，國內傳媒都以級數差距太遠嚟形容，今仗仲陣容不整，曼城守將拿斯達錫、莫斯科中央陸軍中場蘇蘭托錫都因傷缺陣，作客唔夠踢。

另外，同組克羅地亞主場對蘇格蘭，客軍出線無望講明會大量起用副選同新人，雖然克羅地亞喺對賽往績方面處下風，但此一時彼一時，主隊贏面高唱入雲。

（周六凌晨2時15分開賽）
Anton推介：

比利時讓球勝 ★★★

克羅地亞勝 ★★★