迷魂大法搓暈德國 小狂牛半和好路

猪拉多纳

假以色列舉行的U21歐國盃「死亡B組」今晚重頭戲，衞冕嘅西班牙U21火併德國U21，「小狂牛」手握三分，今仗唔會同你急，必定慢慢搓睇定嚟食，德軍雖欲贏波搶分，但礙於對手超強控球能力，想急亦急唔嚟，隨時令比賽陷入拉鋸局面，斯維認為2.15倍「半場和」更加抵玩。

（now 633及635周一凌晨2時30分直播）

西班牙U21踢法同大國腳一脈相承，都係控球大過天，不斷傳波搓到你暈，藉此消耗對手體力，當然咁踢唔係萬能，好似上仗對住決心死守嘅俄羅斯U21，圍住嚟砌又如何？落得久攻不下嘅困局，若非後備入替嘅皇馬中鋒艾華路莫拉達末段嘅神來之筆，早就失分而回喇。

的確，有「新金童」艾斯高、堤亞高艾簡達拿、蒙尼恩嘅黃金中場，「小狂牛」絕對可以搓到對手團團轉，但佢哋始終冇個可以一錘定音嘅射手，無論係艾華路莫拉達或洛迪高摩連奴，臨門一腳都略顯幼嫩。
德軍後防曳唔敢冒進

睇番B組形勢，依家西班牙U21有3分在手，呢場和波擸一分都冇壞，繼續使出最耍家嘅「迷魂大法」，睇準機會先作出致命一擊。至於上仗對荷蘭U21臨尾香嘅德國U21，以史提芬菲斯卡為首嘅後防穿晒窿，搞到一向穩陣嘅利華古遜門神賓特尼奴頻頻犯錯，睇見都牙煙，實畀主帥阿祖安省到立立令。

由於對手控球率高，受過教訓的德軍就算想贏波，亦唔會冒進，先做好防守等你嚟攻，「小狂牛」未必咬得入佢哋，上半場處於膠着狀態一啲都唔奇，「半場和」有2.15倍值博。