小鬥牛兵攻守平均W「德」

猪拉多纳

德國喺U21歐國盃B組首戰同荷蘭鬥得燦爛，之不過喺最後階段被絕殺，除咗暴露防線存在唔少漏洞，更令出線陷於劣勢，如果想要成功晉級，今場3分可謂志在必得，但遇着穩打穩紮、力爭衞冕嘅西班牙，「小日耳曼兵」壓得太上隨時自取滅亡，寧捧1.88倍客勝！

（now633及635台周一凌晨2:30直播）
德國U21防線鬆散

崇尚進攻嘅德國防線唔夠穩陣，鋒線亦唔見得銳利，無論係擔正落場嘅穆拉柏，抑或後備入替嘅禾蘭，表現都唔突出，前者首場仲拉傷腿筋，提早退下火線，就算有消息話佢趕及傷愈披甲，但實際幫助有限。再者，首場所入兩粒全靠賀治比博得12碼及尾段建功，不過經過呢場之後，今晚西班牙實搵專人招呼佢，賀治比單天保至尊呢台戲，相信未必再有得唱。

西班牙首輪雖然小勝俄羅斯1粒，但全場控制戰局取得一面倒攻勢之餘，對手直到完場連1次中龍嘅埋門都冇，攻守平均比德國優勝得多。陣容方面，除咗由効力曼聯嘅門將迪基亞把守最後一關，馬斯巴查、堤亞高艾簡達拿同基斯甸泰路等巴塞兵組成嘅骨幹亦悉數候命，配合埋應屆「歐洲金童」艾斯高擔任進攻核心，真係瓣瓣有，要擊退防線鬆散嘅德國，簡直易如反掌。