南韓搶W去巴西

猪拉多纳

太極虎發惡 狂噬烏茲別克
世界盃外圍賽亞洲區A組上演矚目榜首對決，一哥南韓主場迎擊次席球隊烏茲別克，「太極虎」自86年起踢勻每屆世盃決賽周，若然去到今屆斷纜，全軍上下都會成歷史罪人，呢隻鑊冇人孭得起，故將帥不敢怠慢，必定瞓身搏殺，希望明年進軍巴西！論往績南韓主場一向剋死烏茲別克，生死戰冇得保留，熱捧主勝！

（now 671及672周二晚7時直播）

86年後未斷過纜
南韓同日本一向喺亞洲賽都惡晒，今屆日本已提前取得世盃入場券，南韓現時仲要同烏茲別克及伊朗鬥餐死，表現確實較為失色。自82年缺席世界盃後，南韓打後咁多屆都成功取得入場券，國民已視之為理所當然，如果餘下兩戰有乜閃失，佢哋隨時緣盡世盃，到時會係一場大災難，不但教練團同球員會成千古罪人，連當地足總管理層及相關人士都會遺臭萬年，絕對唔係講玩！

南韓教頭崔康熙藝高人膽大，今次點兵棄用中場大將寄誠庸同具滋哲，理由係兩人都受傷患困擾，同樣不在最佳狀態。大軍上場作客黎巴嫩佔盡上風，攻門都好到肉，偏偏係差埋門嗰腳，好在最後都喺尾段扳平執番1分，現時形勢唔算太壞。崔康熙一向鍾情進攻足球，呢場生死戰主場出擊正正係開正佢嗰瓣，可以盡遣李青龍、李東國、李根鎬同孫弘民等猛將落場，擺出全攻陣式搏殺。

近5主場對陣全勝
烏茲別克獨沽一味玩穩守突擊，靠中場迪積佩洛夫及射手格恩里克爭取士哥，佢哋上場作客中國贏波只係對手太弱，不宜睇得太高，今次作客遇上發晒癲嘅「太極虎」肯定惡頂，情況唔樂觀。

翻查往績，南韓5次主場對烏茲別克錄得全勝靚績，包括上年大勝4比2，擺明剋死對手，今戰如能贏波，另一邊廂如伊朗輸波，佢哋即可提前取得入場券，為免夜長夢多，誓必打真軍盡搶3分！