荷蘭U21照搶小狂牛

猪拉多纳

出線權在握 着火勒唔住
「小橙軍」兩仗入8粒信心爆棚，使驚你「小狂牛」？假以色列舉行U21歐國盃B組最後一輪，荷蘭U21鬥西班牙U21爭小組首名。荷蘭攻力強炮台處處，必想搞掂西班牙證明自己；「小狂牛」控球係強，但兩軍已出線根本唔使咁搏，西班牙U21Ｗ得1.93倍離譜，吼荷蘭1.75倍「+1」！

（now 633及635周四凌晨零時直播）

話就話係「死亡B組」，但打落俄羅斯U21完全冇得打，而德國U21負隅頑抗下，亦落得2連敗，荷蘭同西班牙連贏2場後，已經篤定晉級，荷蘭就算打和都可首名出線。「小橙軍」大踢攻擊足球，快速突擊好得人驚，其中盧克迪莊、利萊費亞、韋拿杜姆腳風都好順，上場對小俄軍簡直如入無人之境，贏夠5個1皮。

上屆世界盃決賽，荷蘭就係飲恨於西班牙腳下，依家出面個個睇好「小狂牛」分組3連勝，預料荷蘭係較具戰意一隊。講控球、技術，西班牙的確較高，但今戰雙方已經出線，「小狂牛」冇必勝需要，硬鬥硬下揀受讓一方合理。

德國砌俄攞尾彩
另一場德國U21鬥俄羅斯U21，查實「小德軍」分組2戰表現唔曳，首場畀荷蘭絕殺非常唔抵。當前德國波大盛，佢哋都想攞番個尾彩，今場料可憑質砌低「小俄軍」。

（周四凌晨零時開賽）