喀麥隆鋒力曳入球細

猪拉多纳

世界盃非洲區外圍賽第3圈已經去到最尾階段，由於只有10組嘅榜首球隊可以出線附加賽，所以難免會有名牌面臨出局危機，暫時就以I組嘅喀麥隆最牙煙，今晚作客剛果民主共和國一戰如果輸波的話，出線形勢就會變得極之被動。
剛果民主共和國防守勁

睇番I組出線形勢，打少1場嘅喀麥隆落後於兩日前贏波嘅利比亞3分，而且得失球差落後4球，除非今場可以大比數炒起剛果民主共和國，否則今場贏少過4球抑或和波都好，到9月最後一輪都係要贏利比亞先可以搶到榜首，所以今場「不屈雄獅」作客出戰，絕對唔係非勝不可，拎1分已經夠數。

由於喀麥隆王牌射手伊度奧於外圍賽初段拒絕入選，到近期肯聽話入伍，又因為受傷缺席包括今戰嘅兩場6月大戰，搞到喀麥隆踢4場外圍賽先入得4球。至於主隊嘅剛果民主共和國就勝在防守出色，4場外圍賽就只係失過1球，所以今場預料係悶戰居多。投X方面，應以1.46倍入球細最穩陣，但想較好分頭，可以博2.85倍和，再貪心嘅不妨直取7倍0:0和波。

（開賽時間：周日晚10:30）