巴西摷爆墨西哥

猪拉多纳

尼馬晒冷為10號仔正名

洲際國家盃A組第二輪，東道主巴西對墨西哥，「森巴兵團」主帥史高拉利功力果然深厚，剛好喺賽事展開前將球隊狀態調校至高峰，早前熱身賽鬥法國及上仗分組賽揭幕戰對日本，都踢出霸氣，尤其係尼馬以精彩演出，要證明自己有潛質着起球王比利件10號波衫。巴西全面甦醒，捧盃重振聲威之前，今仗先要趁機教訓倫奧決賽仇家墨西哥，搶番失去嘅「金牌」，捧「讓球主勝」。

（無綫翡翠台及明珠台周四凌晨3時直播）

「大菲」史高拉利重掌巴西帥印後，表現一直備受質疑，皆因領軍頭六場，只贏過玻利維亞，國際足協世界排名跌出20名之外。不過「大菲」好清楚自己目標，從之前熱身賽搵出不足之處作出改善，趕及喺洲際盃展開前，谷起狀態及信心，其中尼馬進步最大，上仗射入靚波，亦為隊友製造唔少攻門機會。巴西近年成績欠佳，好大程度因為朗拿甸奴走下坡後，缺少一位領軍人物，尼馬以行動證明自己可以接班，為「森巴兵團」注入靈魂，重回正軌。
誓報倫奧失「金」之仇

相比之下，墨西哥頹勢未止，近十場僅一勝，上仗對意大利，防線更錯漏百出，一班守將走位凌亂，往往鹵莽犯規，如非球證網開一面，起碼輸兩球十二碼。墨西哥亦經常喺危險地帶畀對手博到罰球，結果其中一次被派路主射得手。巴西陣中不乏罰球專家，啱晒佢哋胃口。

巴西去年倫奧決賽以1比2不敵墨西哥，始終未能達成男足金牌夢，當時幾位主將包括侯克、尼馬、堤亞高施華及奧斯卡杜斯山度士仍在陣，佢哋對失落金牌耿耿於懷，今次正好趁機盡數對手，報番一箭之仇。