尼馬殺氣勁 巴西「大」報復

猪拉多纳

洲際國家盃A組第2輪賽事又有好戲上演，東道主巴西對墨西哥，可以話係復仇「大」戰。上年嘅倫奧足球決賽，巴西畀墨西哥打沉痛失金牌，當時有份出戰嘅主力包括尼馬，肯定希望洗脫恥辱，殺氣夠使乜怕冇波入？1.65倍玩入球大啱數！

（無綫翡翠台、明珠台及高清翡翠台、中央5台周四凌晨3:00直播）

巴西喺首場分組賽以3:0大勝日本，尼馬開波冇耐射入靚波，證明自己夠料踢巴塞隆拿。雖然尼馬上場撞傷後腰退下火線，但問題其實唔大，佢自己更保證會正選上陣招呼墨西哥。仲有呀，自從巴西創出世界排名新低後，成班球員似乎醒番，先後淨數法國同日本3蛋，仲連臨時補選嘅前鋒祖奧都有波入添。
森巴兵「醒番」唔敢揸流攤

最重要係，上年倫奧有份失金嘅尼馬、侯克、奧斯卡杜斯山度士同堤亞高施華，有機會喺呢場大報復，升呢做埋國家隊隊長嘅堤亞高施華，賽前更講明唔會放過墨西哥，兼且教頭史高拉利今次冇選柏圖、卡卡同朗拿甸奴，為咗確保有得踢出年世盃決賽周，相信森巴兵團唔敢揸流攤，否則隨時被飛出局。
「小豌豆」國際賽士哥僅遜韋拿

另一方面，墨西哥上場以1:2不敵意大利，但其實表現唔失禮，射入12碼嘅「小豌豆」查維亞靴南迪斯，過去為國家隊上陣51場入33球，平均每場入0.65球，而且得25歲嘅佢，國際賽入球係今次大賽各隊球員入面嘅No.2，只係少過西班牙嘅韋拿（53球），巴西撞到佢隨時出醜，駁火格入球大好易開。

洲際盃A組
森巴兵7戰不敗

‧近6次交手，兩軍各贏3場。

‧巴西連續7場未輸過。

‧巴西近8場比賽，7場開大。
墨西哥近況差捧巴西「讓主」

巴西首戰出擊就以3:0大破日本，火力猛之餘，亦成功壓制日本嘅反擊，佢哋擁有尼馬、侯克等一級前鋒，入波真係冇咩難度。反觀對手墨西哥近8場比賽只贏得1場咁大把，對手仲要多數係中北美洲嘅國家，可想而知佢哋狀態幾差，相信巴西有條件贏多過一球，1.92倍「讓球主勝」係信心之選。