米贊比碌卡最穩陣

猪拉多纳

周五凌晨上演三場瑞典超，阿King當然冇偷懶，推介一條三串一過關畀大家，分別為米贊比主W、馬模客W及諾高平入球細，乘埋有5.8倍有分頭。

先講米贊比主場鬥卡爾馬，米贊比上季長期於聯賽榜下游掙扎，主要問題係攻力不足，上季三十場聯賽合共只入得三十三球，今季新上任教頭杜斯甸臣決定一改作風，大踢進攻足球，開季至今佢哋已經射入二十三球，入球數字僅次於攻力最強嘅榜首隊伍希爾星堡。杜斯甸臣尤其喜歡於主場排出三箭頭攻堅，故此主場比賽經常上演入球騷，對上四場主場聯賽就同對手合力炮製二十一個士哥，相信今仗唔會貿貿然改變踢法。

卡爾馬本身都係一支主強客弱球隊，所以唔好預期佢哋今場有咩好表現，睇番佢哋今季聯賽六場作客只有一場冇失波，防守甩漏甚多，好難頂得住米贊比強攻，捧主W好正路。

（周五凌晨1時開賽）
串馬模客W諾高平細

另外西里安斯卡主場鬥馬模，西里安斯卡被視為降班熱門之一，實力唔慌好得去邊。馬模經過五月份一段低潮期後，上輪聯賽終於作客擊敗布洛馬波卡納重響勝鼓，信心回升，目前佢哋只係落後希爾星堡六分，爭標機會仍在，決心絕對唔需要懷疑。最後諾高平主場鬥哥登堡，哥登堡排名及實力雖然高過對手，但今季作客表現飄忽，已經連續三場未贏過，諾高平近況亦唔算好，估計大家今仗都會踢得較保守，敲細盤最穩陣。