積多福不簡單

猪拉多纳

　　今日沙田跑11場賽事，好唔好賭係其次，最緊要頭腦清醒，睇啱邊場先好埋手，因為場次多唔代表選擇多，講得白啲，今期有好多場合根本水鬥水，若果原本備受重視那三兩駒失準，賽果隨時亂晒籠、爆到七彩，所以，揀邊啲熱門嚟買，都唔係冇學問。

　　第二場四班1200米。「嫡愛」之前跑兩場谷草，旨在熱身，根本冇心出手，名次完全唔起眼，不過，上場轉戰田草，走勢即時變了另一匹馬，末段追勢幾勁，看來經過熱身兩場，對進度有好大幫助。今仗交回韋達手上，唔轉路程，把握應比上賽大，排到好位，估計賽事中取位又會比上場理想，條件夾夾埋埋，或可勝回一仗。

　　第四場五班1600米。真係唔明「勁加勁」衰邊瓣？！淪落到降至五班，如果話佢5歲退化，又唔能夠成立，因為3個月前仲贏緊「常盈多」，而不敵「品學兼優」及「感恩」，當時評47分，相比目前的39分，對手又水到唔恨，形勢可謂大逆轉，除非本身遇弱愈弱，只要交得出早前上名時七八成水準，至少會有位置。

　　第九場三班1200米。「積多福」初出此程跑第六名，翌仗得第四，李廐自購馬嚟得咁快例子唔多，證明級數唔簡單。今仗路程不變，搵到巫斯義，加強配搭為求贏馬，鬥志好到加零一。

　　點買法　　

　　「積多福」隔晚有超過10倍獨贏，位置約為4個開，賠率相當抵，一於1W2P，唔使刻意搵多隻嚟過關。如果想起孖，又唔介意熱門的話，可以射第二場「嫡愛」。