聖羅倫素 謝幕戰着晒火

猪拉多纳

阿甲煞科戰聖羅倫素主場迎戰拉魯斯。聖羅倫素可以話係近期阿甲最火熱嘅球隊，近11場賽事未輸過之餘仲贏咗其中7場，無論主場作客都咁醒，今仗喺主場踢謝幕戰肯定全力以赴。拉魯斯上周中補賽不敵學生隊失落秋季聯賽冠軍，一眾球員搏咗成季先宣告緣盡錦標，士氣難免受到影響。其實拉魯斯近期除前仗主場大勝河床外，表現只屬一般，加上球隊最近兩仗作客皆落敗，今仗要造訪近期狀態弗到震嘅聖羅倫素，相信難望全身而退，一於捧聖羅倫素上盤。

（周一清晨5時開賽）