南美世仇打吡 難演入球騷

猪拉多纳

洲際國家盃已經完成分組賽階段，Peter就覺得場場波都咁精彩。唔係賣花讚花香，實在兩組合共8支球隊都對於今屆洲際國家盃極之重視，唔單止挑選最好球員來到巴西參賽，而且絕大多數球隊都大踢開放式足球，就連一向以防守見稱嘅意大利，最尾一場分組賽都唔「錫力」，與死敵巴西鬥攻，搞到場場都係入球騷，球迷自然睇得開心又過癮啦！
巴西防守好出色

提到巴西嘅死敵，除咗阿根廷外，其實另一支南美波烏拉圭同森巴兵都係世仇。首場4強戰由呢兩支南美球隊互撼，Peter覺得入球數字唔會太高。一來今場係一場過淘汰賽，雙方都會謹慎行事，唔會好似分組賽踢得咁開放；二來烏拉圭踢法狠辣，每次對住巴西都好似食咗火藥一樣，攔截時腳腳去盡，因此巴西未必咁易入到對手心臟地帶。

同樣巴西今屆一改過去陋習，防務做得好出色，一定唔會畀卡雲尼、蘇亞雷斯或科蘭有太多上腳時間。預料今場雙方球員會互相角力，入球隨時一粒起兩粒止，大手交易嘅機會應該唔高。
金句：準決賽點同分組賽呀！對賽烏拉圭我要細！