冇埋巴神意國機會渺茫

猪拉多纳

「腦殘」、「巴神」花名多籮籮，巴洛迪利係一位令傳媒、隊友、領隊又愛又恨嘅球員。呢位年輕前鋒百無禁忌，比賽時永冇壓力，因此往往會帶來驚喜同超水準演出，就好似上屆歐國盃4強個人包辦兩球踢走德國，今屆洲際國家盃鬥墨西哥及日本，亦入波帶領球隊勝出。意軍今晚4強戰缺少「巴神」，晉級機會只有兩個：「冇機會同渺茫機會！」

巴洛迪利無論球場內外都係新聞多多，睇佢比賽除咗估佢有冇波入，仲要睇佢會唔會又「腦殘」發作搞事被逐，總之充滿趣味。當然「巴神」本身亦具備上乘足球天分，已經成為意大利鋒線最強武器。意軍遇上西班牙，應該做好防守，再打突擊，但呢種踢法要靠前鋒個人能力，若然巴洛迪利仍在陣，仲有價講，但佢已因傷離隊，意大利前景非常悲觀。
西班牙實力更勝巴西

意大利想晉級決賽，依家就要睇領隊柏蘭迪利有冇奇招制勝，佢屬於「球員中的教練」，治軍鬆緊有度，重視紀律之餘，亦體諒球員需要，畀佢哋嘅女伴隨隊，因而深受球員支持。球員肯全力為佢搏殺，成為意軍爭勝最大元素。

西班牙太強，狀態弗爆、人才濟濟，三線實力比巴西更平均。事實上，「森巴兵團」今屆有唔錯表現，好大程度上多得主場之助，以及尼馬大勇演出，但論整體實力始終略遜於西班牙。
金句：名副其實的一個令你又愛又恨的球員