狂牛不敗金身 再炒意粉

猪拉多纳

今晚洲際盃上演另一場4強大戰，亦係上年歐國盃決賽翻版，西班牙火併意大利！意大利喺該戰畀西班牙怒炒4蛋，揚言要喺洲際盃報仇嘅「腦殘」巴洛迪利因拉傷肌肉已經返國治療，對意大利影響好大。西班牙又啱啱打破法國由94至99年保持嘅連續27場正式比賽不敗紀錄，氣勢如虹，當然撐2.2倍「讓主」，支持西班牙表演多一次「炒意粉」殺入決賽啦！

（無綫翡翠台、明珠台及高清翡翠台、中央5台周五凌晨3:00直播）

西班牙喺分組賽以3戰全勝嘅無敵姿態出線，並創下28場正式賽事不敗紀錄，非常恐怖！「狂牛兵團」嘅優勝之處係板櫈深度極佳，每位球員喺今屆賽事都曾經上陣兼有表現，鋒線上如果蘇爾達杜入唔到波，仲可以靠今屆賽事省咗5粒、信心返晒嚟嘅費蘭度托利斯。
個個有表現28戰不敗

唔好忘記連後防佐迪艾巴都有超強入球能力，上場就入咗兩球靚波，對於同佢一樣踢左閘嘅「張峰」嚟講，艾巴絕對係現代出擊後衞典範！個個都識入波，要撕破意大利條不堪一擊嘅防線又有咩難度先？
「腦殘」打柴 派路頂硬上

意大利喺最後一場分組賽一反常態同巴西鬥攻，無非係想爭取首名出線喺4強避開西班牙，可惜事與願違，輸波之餘巴洛迪利同右閘阿比迪仲齊齊受傷，前者更已返意大利治理。上場因傷避戰嘅中場核心派路雖或可趕及復出，但狀態成疑，即使派「小法老」艾沙拉維攻堅都未必有用。況且「藍衫軍」3場洲際盃夾埋已經失咗8球，咁嘅防線對住西班牙真係唔使諗贏波，望輸少球好過喇！
兩隊洲際盃「大」晒

兩軍分組賽6戰全開入球大。

西班牙分組賽3戰全開「半場勝」。

西班牙分組賽得15球失1球，攻守冠絕今屆洲際盃。
往績支持捧西班牙「半勝」

西班牙喺洲際盃勢如破竹，相信唔少讀者今晚都會對「狂牛」投以信心一票，不過無論係主勝、晉級隊伍或者第一隊入球，全部都冇乜肉食，同時又怕攻守實力稱霸洲際盃嘅佢哋，嚟到淘汰賽階段一球起兩球止開唔到入球大。既然係咁，倒不如揀西班牙1.9倍「半勝」，賠率分頭唔錯之餘，亦有分組賽全開「半勝」嘅往績支持。