「小袋鼠」戰意鮮明「讓客」抵撐

猪拉多纳

土耳其U20以東道主身份出戰世青盃，喺C組首戰3蛋炒薩爾瓦多係威係勢，點知跟手鬥哥倫比亞就無以為繼輸波失榜首。今晚佢哋喺最後一輪分組賽面對澳洲U20，由於得失球差佔優，只要唔輸就肯定出線，取勝決心成疑，主勝隨時變糖衣陷阱，一於揀澳洲受讓嘅2.2倍「讓客」。

（TVB網絡電視02頻道、now810台周六凌晨2:00直播）

施克沙軒同沙利烏簡呢對土耳其中場孖寶，喺首輪分組賽互相造就對方入波，表現Sharp醒，但弊在呢支歌仔淨係對「世青初哥」薩爾瓦多先有得唱，次輪面對上屆8強分子哥倫比亞即時啞火，個款擺到明「欺善怕惡」，況且今場攞1分就確保出線，相信領隊烏斯卡會以做好防守為首要工作，唔會畀班波壓得太上。

對手澳洲喺C組雖然以1分墊底，但班球員表現其實有板有眼，兩場分組賽都先拔頭籌，可惜衰在後防連番大意失波先贏唔到。吸取過呢兩場教訓，加上贏波出線仲有價講，相信領隊奧干會絞盡腦汁諗計堵塞防線漏洞，「小袋鼠」落到場亦肯定搏盡，鮮明「讓客」抵撐。