烏拉圭U20回勇再追

猪拉多纳

世青盃打埋今晚4場分組賽就會抖抖，到下星期二先展開淘汰賽激戰。今晚（六）15有場「雙烏」大戰，由F組烏茲別克惡鬥烏拉圭。烏拉圭上場打贏新西蘭重拾信心，最重要係佢哋用番U20南美國家盃神射手尼高拉斯盧比斯攻堅，撞啱今仗烏茲別克打少個後防主力，一於撐烏拉圭贏多場，要1.75倍客勝。

（TVB網絡電視01頻道、now801台周六晚11:00直播）
烏茲別克後防大佬坐波監

烏拉圭第一場收起喺U20南美國家盃攻入6球嘅尼高拉斯盧比斯，結果有「餐士」都把握唔到，最終輸畀克羅地亞。主帥華斯利上場知衰用番呢個小將擔正，佢亦不負所託用入球回報，今場料再次同前鋒迪亞高科蘭同中場迪阿拉斯卡拍住上，火力有保證，而且佢哋只得3分揸手，出線資格未穩陣，今仗肯定搏老命。

對手烏茲別克暫時有4分喺手，今場只要唔多失球都好大機會攞到最佳第3名嘅資格出線16強，球員戰意斷估冇對手烏拉圭咁強。加上佢哋仲有守將馬斯米蘭科明黃牌夠數要坐波監，勢必影響防守力，相信難阻回勇嘅烏拉圭全取3分。
世青盃賽制：

分組賽24隊分6組，每組首、次名，以及4支最佳小組第3名將進身16強。同分先計得失球 。