黃朝復辟巴西屠牛

猪拉多纳

夢幻決戰 尼馬發功阻西班牙攞大滿貫

洲際國家盃上演超級夢幻決賽，主辦國巴西迎戰世界盃冠軍西班牙，堪稱兩大足球盛世交鋒！「迷失足球帝國」巴西沉寂多時後，終於復甦，趁主場之利全力催谷爭標，為明年主辦世盃決賽周造勢。森巴兵團喺新世代球王尼馬率領下，重現王者風采，今次遇上「無敵狂牛」西班牙，正係重奪球壇一哥地位嘅好時機，鬥志及士氣處於巔峰。西班牙上仗同意大利激戰120分鐘，兼少一日休息，體力非常輸蝕，平手盤力捧巴西完成3連霸，打破「鬥牛國」大滿貫之夢。

（無綫明珠台及高清翡翠台周一早上6時直播）
防線穩陣 綠葉有貨交

巴西請得02年世界盃冠軍領隊史高拉利回巢，經過一輪調教，重拾昔日王者本色，由分組賽至4強全勝，氣勢銳不可當。森巴兵團戰績彪炳，除咗史高拉利領導有方外，前鋒尼馬亦功不可沒，呢位21歲新世代森巴球王不負眾望，今屆賽事已射3個入球，上仗即使冇波入但都貢獻助攻，幫巴西尾段絕殺烏拉圭，盡顯王牌關鍵作用。巴西近年迷失球壇，就係因為缺少一位具分量嘅10號仔，依家尼馬挺身而出，為球隊注入靈魂，足球王國終於返嚟啦！

除咗尼馬演出精湛外，拍檔費特、後備前鋒祖奧、中場荷西保連奴、奧斯卡杜斯山度士等成班「綠葉」都有出色表現，兩閘丹尼爾及馬些路助攻力強，巴西進攻板斧多元化。最難得係防守比以往穩健，可謂攻守兼備，配合主場球迷打氣，足以壓倒西班牙。
四強陷苦戰 弱點現形

事實上，西班牙分組賽全勝攻入15球，只因同魚腩大溪地及名過於實嘅尼日利亞同組，根本未受真正考驗，加上賽事期間陣內兩度爆出召妓醜聞，大大影響球員作戰心情。上仗對意大利就即刻現形，喺對方緊迫之下，一向引以為傲嘅控球在腳、小組入滲踢法，發揮唔到作用，如非卡斯拿斯屢救險球，可能已經出局。面對陣容不整兼年紀偏大嘅意大利，西班牙表現都咁狼狽，遇上實力更強嘅巴西，恐怕難再獲幸運之神眷顧。

而講到「地上最強」Tiki-taka踢法，巴西先至係大師傅，依家係時候教訓一下後輩嘞！