無名英雄荷西保連奴 布斯基斯

猪拉多纳

終於嚟到洲際國家盃嘅煞科日《老友傾波》最後一擊，「四眼哥」請番第一日亮過相嘅TVB評述員「靚佬」潘文迪，再同大家傾波。
「巴西防守第一道屏障」

今日王者之戰由巴西火併西班牙，各大傳媒幾乎每日都有兩隊球星嘅報道，誇張啲講可謂寫到爛，反而「四眼哥」有興趣睇吓「阿迪」點揀呢兩隊波嘅「無名英雄」。「先講巴西，我覺得荷西保連奴雖然冇佢嘅球星隊友咁有星味，但佢喺場上嘅重要性絕對唔細，特別係目前嘅巴西隊，進攻上十分倚重個人化，一旦進攻失敗就好容易畀對手打到反擊，喺呢個時候荷西保連奴嘅作用就好大，嚴格嚟講佢係巴西防守上第一道屏障；而且佢腳下功夫好好，喺球隊反擊嗰陣，同樣起到好大作用！」

至於同樣星光熠熠嘅西班牙，布斯基斯就得到「阿迪」垂青成為「狂牛無名英雄」：「西班牙嘅控制踢法要求球員不斷傳球、走位、拉空同入楔，而沙維同恩尼斯達之可以咁盡情喺中場發辦，其中一個原因係佢兩個背後有一個好值得信任嘅隊友喺度支援，佢就係布斯基斯。佢唔止幫到沙維同恩尼斯達去駁腳，直情係中後場嘅指揮官，好多時球隊進攻或者防守嘅第一點喺邊個度開始，決定權都落咗喺佢身上，能夠稱職做好『影子指揮官』嘅角色，佢係必須具備好高嘅球賽閱讀能力。」
西班牙中後場指揮官

評完人哋，不如評吓自己喺今次洲際國家盃嘅表現啦，「四眼哥」問佢評自己幾多分，佢就話唔識評，只係話：「第一次全情投入一個大賽嘅評述工作，實在係一次好難得嘅經驗，我知道我仲有好多改善嘅空間，我會努力，希望喺TVB嚟緊直播嘅賽事，可以有愈嚟愈好嘅發揮。其實講波同踢波一樣，踢得多自然進步，希望我講多啲都會有進步啦！希望球迷同『四眼哥』可以繼續支持我。」嘩！咁識講嘢，又靚仔，仲夠你撈嘅？